"Barselona" hujumchisi Serxio Aguero yuragidagi muammolar sabab uch oyni futboldan tashqarida o‘tkazadi, deya xabar berdi klub rasmiy Twitter sahifasi.
Xabar qilinishicha, hujumchi shifokor tomonidan ko‘rsatilgan diagnostika va davolash muolajasidan o‘tgan. Yaqin uch oy ichida u maydonga qaytolmaydi. Bu vaqt davomida aniq tiklanish vaqtini aniqlash uchun davolash jarayonining samaradorligi baholanadi.
Aguero "Alaves" bilan uchrashuvning 41-daqiqasida ko‘kragini ushlagan holda maydonga yiqilganidan so‘ng almashtirilgan edi. Hujumchi keyinroq yurak tekshiruvi uchun zudlik bilan shifoxonaga olib ketilgan.
33 yoshli futbolchi joriy mavsumda “Barsa” safida beshta o‘yin o‘tkazib, bitta gol urgan.
