Professional futbol klublariga ajratilayotgan mablag‘larning maqsadli sarflanishini monitoring qilish, klublarning avvalo infratuzilma va akademiyani rivojlantirishga pul yo‘naltirishini ta’minlash maqsadida Vazirlar Mahkamasining 2021 yil 30 apreldagi “Futbol klublari faoliyatining samaradorligini oshirish chora-tadbirlari to‘g‘risida”gi 261-sonli qaroriga muvofiq professional futbol klublarining yillik xarajatlar smetasi O‘FA bilan kelishilgan holda tasdiqlanishi belgilandi.

Yillik xarajatlar smetasi asosida moliyaviy mablag‘larni ajratilishida, birinchi navbatda, futbol klublari infratuzilmasini yanada rivojlantirishga, xususan, stadion va maydon parvarishiga, bolalar-o‘smirlar futbol akademiyasini hamda o‘quv-mashg‘ulot qarorgohini tashkil qilinishi, ayollar va futzal jamoalari, shuningdek, turli yosh toifasidagi jamoalarning musobaqalardagi ishtirokini samarali tashkil etilishiga e’tibor qaratilishi ustuvor maqsad bo‘ladi.

Shu asnoda Superliga hamda Pro ligada ishtirok etadigan har bir futbol klubi 2022 yilgi xarajatlar smetasi loyihasini hozirdan ishlab chiqmoqda va O‘FAga kelishish uchun taqdim etmoqda. O‘FA va O‘zPFL vakillaridan tashkil etilgan maxsus komissiya klubning xarajatlar smetasi loyihasiga infratuzilma (stadion maysasi, projektor, kiyinish xonalari va hokazo), akademiya (o‘quv-mashg‘ulot binolari mavjudligi va hokazo), ayollar va yoshlar tarkiblari (sport liboslari bilan ta’minlanishi, ovqatlanish, mashg‘ulot maydonlari mavjudligi va hokazo) xarajatlari kiritilgani bo‘yicha o‘z taklif va tavsiyalarini bermoqda.

Shu yo‘sinda aksariyat klublarda ancha paytdan buyon yechim topmay kelayotgan jiddiy muammolarni bosqichma-bosqich bartaraf etish ko‘zda tutilmoqda.