O‘zbekiston Kubogi ½ Final AGMK - “Nasaf” (0:2) uchrashuvidan so‘ng bo‘lib o‘tgan matbuot anjumanida Ro‘ziqul Berdiyev ishtirok etdi va jurnalistlar savollariga javob berdi.

“Finalga chiqqanimizdan juda ham xursandman. Bugungi bellashuvda futbolchilarimiz haqiqiy qahramonlik ko‘rsatishdi. Buning uchun ularga rahmat aytaman. O‘yinda ham biz mezbonlarga qaraganda yaxshi o‘yin ko‘rsatdik va shuning hisobiga g‘alaba qozondik. O‘yin juda og‘ir bo‘ldi. Biz o‘tgan yili ham kubok bellashuvining aynan shu bosqichida Olmaliqda o‘ynab, mag‘lubiyatga uchragan edik. Bugungi bahsda biz xaqli g‘alabaga erishdik. O‘yin kutilmagan holatlarga boy bo‘ldi. Penaltidan foydalana olmadik, bir kishi kam bo‘lib harakat qildik. 70-80 daqiqa AGMK maydonida bir kishi kam bo‘lib g‘alaba qozonish bu qahramonlik deb bilaman” – deb o‘z fikrlari bilan o‘rtoqlashdi Ro‘ziqul Berdiyev.

- To‘g‘ri bugun jamoa g‘alaba qozondi. Hakamlar ishini qanday baholaysiz. Shu vaziyatlar aksincha ham bo‘lishi mumkin edi?

- Bilmadim. Hakamlar xato qilishdan qo‘rqishganida vaziyatlarni ko‘rib chiqib, qaror qabul qilishmas edi. Bu yerda faqat bosh hakamning emas, ko‘pchilikning qarori bo‘ldi. Bo‘lib o‘tgan vaziyatlarni yaxshilab o‘rganib, keyin qaror chiqarishdi deb o‘ylayman. Hakamlar ishiga e’tiroz bo‘lishi mumkin emas. Ular bugun o‘yinni yaxshi boshqarishdi. Bu gaplarni g‘alaba qozonganimiz uchun aytmayabman. Ular har bir vaziyatni chuqur o‘rganib chiqishdi.

- Bugungi o‘yinda hakamlik ishiga qanday qaraysiz? VAR da ham sobiq o‘tmishda “Nasaf” bilan yutuqlarga erishgan Ahrol Risqullayev ishladi.

- VAR da bugun kim o‘tirib ishlaganinga e’tibor berganimiz yo‘q. Kelinglar bellashuv haqida gaplashaylik. O‘yin haqida savollar bo‘lsa beringlar.

- “Nasaf” bir kishi kam bo‘lib qolgandan so‘ng jamoa o‘yini o‘zgardi. Futbolchilar o‘yinni cho‘zishga harakat qilishdi.

- Bugun "Nasaf" nohaq g‘alaba qozondi demoqchimsiz? Rahmat, biz g‘alabaga erishdik va bu natija bilan barchani tabriklayman.