Oʻzbekiston futbol assotsiatsiyasining majlislar zalida OʻFA Prezidenti Abdusalom Azizov raisligida 2021-yilgi mavsum yakunlari va keyingi yilgi mavsum rejalariga bagʻishlangan yigʻilish boʻlib oʻtdi. Unda milliy chempionatimizda toʻp surayotgan klublarning bosh murabbiylari, jismoniy tayyorgarlik va ilmiy-metodik tahlil boʻyicha mutaxassislari ishtirok etishdi. OʻFA rahbari futbolchilarning betartib transferlar natijasida doimiy klublarni almashtirishi, bunda oʻsish va yuqori natija qayd etish asosiy maqsad boʻlmayotganligini tanqid ostiga oldi. Masʼullarga keyingi mavsumdan transferlar jarayonini qattiq nazorat ostiga olinish topshirigʻi berildi. Shuningdek legionerlarni olib kelishda ularning darajasi va saviyasiga alohida eʼtibor qaratilishi kerakligi taʼkidlandi.

Superliganing soʻngi oʻyinlari murosasiz bahslarga boy tarzda oʻtganligi, kuchli uchlik uchun kechgan raqobat oxirgi turgacha saqlanib qolganligi, adolat prinsiplariga rioya etish yoʻlida barcha harakatlar amalga oshirilgani taʼkidlandi. Abdusalom Azizov keyingi mavsumda ishtirok etadigan klublar soni oʻzgartirilmasligi, barcha rejalar reglament asosida tashkil etilishini maʼlum qildi. Yangi mavsumdan boshlab klublar uchun bir qator standartlar joriy etilishi, xususan, futbolchilar uchun jismoniy tayyorgarlikning minimal darajasi talablari belgilanishi va maydonlar holati qatʼiy nazorat ostiga olinishini aytdi.

Klub akademiyalari va ayollar futbolini rivojlantirishga ham tizimli va sifatli yondashish talabi qoʻyildi.

Klublar tomonidan sarflanayotgan mablagʻlarni aynan futbol infratuzilmasini bosqichma bosqich rivojlantirish uchun maqsadli yoʻnaltirish zarurligini taʼkidlab oʻtdi.

OʻFA birinchi vitse-prezidenti Ravshan Ermatov yuqori darajadagi futbolchilar yetishtirishda muhim boʻlgan jihatlar, xususan sport tibbiyoti, vitaminizatsiya nutritsiologiya, zamonaviy sport texnologiyalaridan samarali foydalanish va bu yoʻlda mutaxassislarni tayyorlash, murabbiylar taʼlimi masalalarida taklif va tavsiyalar berdi.

Kun tartibidagi masalalardan Oʻzbekiston chempionati-2022 musobaqalari reglamentiga Superliga oʻyinchilarining jismoniy tayyorgarligiga minimal talablarni joriy etish mavzusi muhokama qilindi. Bu oʻz navbatida natija va koʻrsatkichlarga ijobiy taʼsir qilishi, bunday tahlil zamonaviy futbol talabi ekani eʼtirof etildi.

Oʻzbekiston milliy terma jamoasi bosh murabbiyi Srechko Katanes ham soʻz olib, futbol sport turlari ichida eng koʻp energiya talab qilishi, shu sababli futbolchilarning jismoniy va ruhiy holatini yaxshilash birinchi galdagi vazifa ekanligini aytdi. Futbolchilarga beriladigan yuklamalarni doimiy ravishda nazorat ostida ushlash, bu borada klublarda jismoniy tayyorgarlik boʻyicha tajriba ega mutaxassislar faoliyat yuritishini tashkil etish kerakligini qoʻshimcha qildi.

Shuningdek, yigʻilishda Superliga murabbiylari bir qator muammoli vaziyatlarga oʻz takliflarini bildirib oʻtishdi. OʻFA rahbariyati ushbu muammolar yechimida jamoalarga yordam koʻrsatishini maʼlum qildi.