Namanganda bo‘lib o‘tgan “Navbahor”ga qarshi bahsdan so‘ng “Qo‘qon-1912” jamoasi a’zolari ta’tilga chiqishdi. Uzoq davom etgan mavsumdan so‘ng jamoa futbolchilari oila davrasida hordiq chiqaradilar.

Baxtiyor Ashurmatov boshchiligidagi murabbiylar shtabi yangi mavsumga tayyorgarlik rejasini ishlab chiqishgan. Rejaga ko‘ra jamoa a’zolari tayyorgarlikning 1-bosqichini 20 dekabr kunidan boshlashadi. 20 dekabrda barcha futbolchilar Qo‘qonda to‘planishadi hamda mashg‘ulotlarda ishtirok etishadi. Dastlabki yig‘in 28 dekabr kuniga qadar davom etadi. Shundan so‘ng jamoa a’zolari bir dasturxon atrofida yangi yil bayramini o‘tkazishadi. Yangi yil arafasida futbolchilarga yana qisqa muddatli ta’til beriladi. “Shunqorlar”ning yangi, 2022-yildagi dastlabki yig‘ini 4 yanvar kunidan Toshkent shahrida boshlanadi.