OʻFA va Yaponiya futbol assotsiatsiyasi oʻrtasida videokonferensiya orqali muzokaralar boʻlib oʻtdi.

Ushbu muzokaralarning maqsad va vazifasi — Oʻzbekiston futbol assotsiatsiyasi hamda Yaponiya oʻrtasidagi yaqin va samarali hamkorlikni davom ettirish, ikki mamlakat futbolini rivojlantirish, oʻzaro tajriba almashish, shuningdek, Oʻzbekistonga Yaponiyadan murabbiy va mutaxassislarni jalb etishdan iborat boʻldi.

OʻFA birinchi vitse-prezidenti Ravshan Ermatov Oʻzbekiston ayollar terma jamoasi bosh murabbiyligi va hududiy akademiyalarning texnik direktorligi lavozimi uchun Yaponiyaning katta tajribaga ega mutaxassislar xizmatlaridan foydalanish masalasini muhokama qildi.

“Soʻngi yillarda yurtimizda sportga, xususan, ayollar futboliga eʼtibor har galgidan ortgan. Shu yoʻlda oʻz oldimizga bir qator maqsadlar qoʻyganmiz. Ayollar futboli borasida katta tajribaga ega Yaponiya bilan hamkorlik qilish maqsadlarimizga erishishda katta yordam beradi, deb oʻylayman”, dedi Ravshan Ermatov.

Dastlabki kelishuvga koʻra, ayollar terma jamoamizga nomzod bosh murabbiy va uning yordamchisi kelasi yilning yanvar oyida yurtimizga kelishi kutilmoqda. Ularning vazifalari qatoriga ayollar futbolini rivojlantirish tizimini yoʻlga qoʻyish va mashgʻulotlarni ilmiy-tahliliy yondashuv dasturlari asosida tashkil etish kabilar kiradi.

Muzokaralar chogʻida shartnomaning shartlari va yapon mutaxassislarining mamlakatimizdagi vazifalari muhokama qilindi. Har ikki tomon ham uzoq muddatli samarali hamkorlik qilishga tayyor ekanliklarini bildirdilar.