O‘zbekiston boks federasiyasi tomonidan har yili an’anaviy tarzda o‘tkaziladigan mamlakat chempionatiga bu gal o‘zgacha taraddud ko‘rilmoqda.
Musobaqa 8-14 dekabr kunlari “Universal” sport majmuasida bo‘lib o‘tadi. Ahamiyatlisi, mahalliy hakamlarimizga tajriba ulashish, bahslarda shaffoflik va xolislikni kuchaytirish maqsadida dunyoning barcha qit’alaridan 8 nafar AIBAning 3 yulduzli darajasiga ega hakamlar janglarni boshqarib boradi. Ularning barchasi Olimpiada yoki jahon chempionatlarida ishlagan va ulkan tajribaga ega referilardir. Shuningdek, janglarni boshqarib boradigan hakamlarni Buyuk Britaniya va Ukrainadan tashrif buyuradigan instruktorlar kuzatib borishadi. Ular ishtirokida chempionatdan avval 5-6 dekabr kunlari mahalliy referilar uchun seminar-treninglar o‘tkaziladi.
Bu yilgi O‘zbekiston chempionatining yana bir muhim jihati, u orqali terma jamoa murabbiylar shtabi Xanchjou-2022 Osiyo va Parij-2024 Olimpiya o‘yinlariga da’vogar yoshlarni saralab olish imkoniyatiga ega bo‘lishadi.