"Everton" bosh murabbiyi Rafael Benitesning taqdiri muhokama ostida qolgan. Bunga jamoaning qoniqarsiz natijalari sabab bo‘lmoqda. "Everton" dastlabki 7ta o‘yinda 4ta g‘alaba va 2ta durang bilan turnir jadvalida 4 o‘rinda turgandi.

Ammo shundan keyin vaziyat o‘zgardi. Hozirda jamoa 14 o‘rinni egallab turibdi. Xavfli zonadan 5 ochko farq mavjud. Shunga qaramay klub egasi Farxad Moshiri Benitesga ishonishini ta’kidlagandi.

Hozirda Benites qishki transferlar oynasida jamoani kuchaytirib olishga umid qilmoqda. U bu haqda shunday deydi:

"Yanvardagi bozor juda ham qiyin kechadi. Negaki, u yerda ko‘p futbolchilar bo‘lmaydi. Tanlov imkoniyati kamroq bo‘ladi. Biroq sizda sarflash uchun pul bo‘lgan taqdirda, uni to‘g‘ri ishlatishni bilish kerak".

Eslatib o‘tamiz, "Everton"ning keyingi bahsi o‘z uyida, "Arsenal"ga qarshi kechadi.