"Эвертон" бош мураббийи Рафаэль Бенитеснинг тақдири муҳокама остида қолган. Бунга жамоанинг қониқарсиз натижалари сабаб бўлмоқда. "Эвертон" дастлабки 7та ўйинда 4та ғалаба ва 2та дуранг билан турнир жадвалида 4 ўринда турганди.
Аммо шундан кейин вазият ўзгарди. Ҳозирда жамоа 14 ўринни эгаллаб турибди. Хавфли зонадан 5 очко фарқ мавжуд. Шунга қарамай клуб эгаси Фархад Мошири Бенитесга ишонишини таъкидлаганди.
Ҳозирда Бенитес қишки трансферлар ойнасида жамоани кучайтириб олишга умид қилмоқда. У бу ҳақда шундай дейди:
"Январдаги бозор жуда ҳам қийин кечади. Негаки, у ерда кўп футболчилар бўлмайди. Танлов имконияти камроқ бўлади. Бироқ сизда сарфлаш учун пул бўлган тақдирда, уни тўғри ишлатишни билиш керак".
Эслатиб ўтамиз, "Эвертон"нинг кейинги баҳси ўз уйида, "Арсенал"га қарши кечади.