“Universal” sport majmuasida o‘tayotgan boks bo‘yicha O‘zbekiston chempionati o‘zining qizg‘in pallasiga kirmoqda. Xabaringiz bor, bu yilgi mamlakat birinchiligi avvalgilaridan tubdan farq qilmoqda.
Musobaqaning ochilish marosimida MOQ Bosh kotibi Oybek Kasimov, MOQ raisi o‘rinbosari, O‘zbekiston boks federasiyasi raisining birinchi o‘rinbosari Saken Polatov, terma jamoamizning murabbiylar shtabi va boshqa faxriy mehmonlar ishtirok etishdi. Tadbir ancha ko‘tarinki ruhda o‘tdi. Prezidentimizning sportchilarimizga yo‘llagan motivasion nutqlari o‘rin olgan videorolik, lazer-shou, Shotlandiya va Ukrainadan tashrif buyurgan ekspertlar, hakamlar qasamyodi ochilish marosimining e’tiborli voqeliklaridan bo‘ldi. Hakamlar nomidan, boks bo‘yicha ilk Olimpiada sovrindorimiz, Atlanta-1996 Olimpiadasi bronza medali sovrindori, hozirda referelik qilayotgan Karim To‘laganov bahslarni halol va shaffof boshqarib borishga qasamyod qildi.
Ayni paytda musobaqada saralash bellashuvlari davom etmoqda. Erkaklar va ayollar o‘rtasida o‘tkazilayotgan chempionatda Respublikamizning barcha hududlaridan kelgan 350 nafar bokschi g‘oliblik uchun kurashmoqda.
