Stiven Jerrard «Liverpul» safidagi 710ta uchrashuv bilan klub muxlislari ko‘z-o‘ngida unutilmas va sevimli nomga aylangan. U nafaqat bir klubda, balki butun dunyoda ma’lum va mashhur, qolaversa, hurmatga sazovar insondir. Jerrard uzoq yillik faoliyati davomida APLni yuta olmagan. Ammo dunyo sahnida o‘zidan o‘chmas iz qoldirgan. Ayniqsa, o‘sha kecha, «Otaturk Stadioni»dagi bahs umrbod barchaning qalbida yashaydi. Shundan beri mana, 16 yil vaqt o‘tdi. Biroq «Milan» muxlislari hali-hamon mag‘lubiyatga ishonishmaydi. Hali ham o‘z-o‘ziga savol berishdan charchashmaydi: nega? qanday qilib?
Negaki, «rossonerilar» o‘sha finalning birinchi bo‘limidan keyin(3-0) kiyinish xonasida bayramni juda juda erta boshlab yuborgan edi. Bu esa o‘ta katta, ta’bir joiz bo‘lsa, halokatli xato bo‘lgan. Stiven Jerrard o‘z jamoasi bilan iroda namoyish etadi va g‘alaba qozonadi. U sheriklari bilan o‘sha davrda «quturib borayotgan» «Milan» tarkibiga qarshi o‘ynagan. Unda Dida, Kafu, Paolo Maldini, Alessandro Nesta, Kaka, Andrey Shevchenko, Klarens Zeedorf hamda Andre Pirlo kabi nomlar bor edi. Shunga qaramay, ikkinchi bo‘limda 3ta gol urishni eplay olgan jamoa, ekstra bo‘limlarda ham darvozasidan ortiq gol o‘tkazib yuborishmaydi. Penaltilar seriyasida esa raqib tor-mor keltiriladi. To‘g‘ri, bu voqeaga ancha bo‘lgan. Ammo uning dovrug‘i hech qachon unutilmaydi.
Keling, Jerrard bilan bog‘liq yana bir voqeani eslaylik. 2006 yilgi mamlakat kubogi finali. Unda «Vest Xem» hamda Jerrard sardorligidagi mersisaydliklar Kardiff shahridagi «Millenium» stadionida to‘qnash kelishadi. O‘yin murakkab, «Liverpul» 28 daqiqaning o‘zidayoq 2-0 hisobida ortda qolayotgan edi. Shunday ssenariy davom etayotgan bir paytda, 32 daqiqada Stiven o‘z sherigi Jibril Sisseni to‘p bilan ta’minlaydi va hisob qisqaradi. Ikkinchi bo‘lim boshlanadi. 54 daqiqada Jerrard muvozanatni tiklaydi(U 54 raqami bilan yaxshi kelishadi. Chunki bir yil oldin «Milan»ga ham aynan shu daqiqada gol kiritgan). O‘yin ekstra vaqtga o‘tadi va yakunda Jerrard va Rafa Benites jamoasi g‘olib chiqadi.
O‘zi, umuman olganda, Jerrard doimo jamoasini qutqaruvchi vazifasida himoya qilgan. Masalan, o‘sha Istanbulda chempion bo‘lgan yilda ham, guruh bahslarida Jerrardning qo‘shib berilgan vaqtdagi kiritgan goli, «Liverpul»ni pley-offga olib chiqqan edi. Keyin nimalar sodir bo‘lganini esa, hamma biladi! Stivi G mukammal yarim himoyachi edi. Moslashuvchan va ko‘p vazifalarni bajara olishi, uning o‘yinlariga chiroy va barqarorlik baxsh etardi. U gol urar, golli vaziyatlar yaratar, raqib hujumini bartaraf qilar, himoya va hujumni bog‘lab berar va eng asosiysi, jamoasiga yetakchilik qilardi. Xullas, uning uzoq yillik faoliyat yorqin lahzalarga boy bo‘ldi. Biz bugun Jerrardning o‘yinlarini nafaqat Kardiffda yoki Istanbuldagi qahramonligi sabab, balki butun futbol dunyosiga bergan yorqin lahzalari uchun ham hurmat bilan eslaymiz.
Uning bir klubdagi umumiy statistikasi quyidagicha:
- 710ta o‘yin;
- 185ta gol;
- 150ta assist;
- 11ta sovrin.
Bugungi kunda u «Aston Villa»ga murabbiylik qilmoqda. Ertaga esa o‘z sevimli o‘yingohi bo‘lmish «Enfild»ga qaytadi. Bundan 23 yil ilgari, 1998 yil 29-noyabrda ilk bor qadam qo‘ygan maydoniga qaytadi! Biroq bu qaytish mersisaydliklarga qarshi, ularni mag‘lubiyatga uchratish uchun bo‘ladi. Nima bo‘lgan taqdirda ham Stiven Jerrardning «Liverpul»ga kelishi nafaqat klub muxlislari uchun, balki butun futbol ommasiga ham qiziq. Biz esa bu voqeani kutib qolamiz.
«Liverpul» - «Aston Villa». 11- dekabr, 20:00(Toshkent vaqti).
Jaloliddin ISMATOV tarjimasi
