Xabaringiz bor, O‘FA terma jamoalar uchun baza va Respublika futbol mahorat maktabi uchun 2 ta gibrid va 2 ta sun’iy maydon bunyod etish bo‘yicha tender e’lon qilingan va unda “HATKO” kompaniyasi g‘olib bo‘lgan edi.

Bugun O‘FA birinchi vise-prezidenti Ravshan Ermatov va “HATKO” kompaniyasi rahbari Gushen Hatko o‘rtasida video-anjuman shaklida muzokaralar bo‘lib o‘tdi.

Muloqotda loyihadan joy olgan obektlarni sifatli tarzda barpo etish hamda zamon talablariga mos zarur jihozlar bilan ta’minlash bo‘yicha fikr almashildi.

“Ushbu uzoq muddatli loyihalar orqali yurtimizdagi futbol maydonlari holatini yaxshilab, xalqaro standartlar darajasiga yetkazish umididamiz. Maqsadimiz nafaqat maydonlarni barpo etish, balki ularni yaxshi holatda saqlash. Buning uchun soha mutaxassislarini tayyorlashimiz kerak”, dedi Ravshan Ermatov.

Shuningdek, suhbat davomida maydonlar holati, ularni parvarishlar texnikalari va stadion infratuzilmasi haqida fikr almashildi. Tomonlar turk kompaniyasining ulkan tajribasini hisobga olgan holda O‘zbekistonning maydonlar bo‘yicha mutaxassislarini maxsus seminar va o‘quv-tayyorlov darslariga jalb etish borasida kelishib oldilar. Loyihaning dastlabki qurilish ishlari 2022 yilning yanvar oyida start olishi rejalashtirilgan.