O‘zbekiston futbol assosiasiyasi mutaxassislari futbol ommaviyligini oshirish, bolalar-o‘smirlar futboli infratuzilmasini tashkil etish va uni yanada rivojlantirish bo‘yicha amalga oshirilayotgan ishlar bilan tanishish maqsadida Qashqadaryo viloyatiga tashrif buyurdi.

O‘FA bolalar-o‘smirlar va ommaviy futbolni rivojlantirish bo‘limi boshlig‘i Ma’mur Saidkasimov viloyat futbol mahorat maktabidagi yosh futbolchilar uchun yaratilgan shart-sharoitlarni, xususan, yotoqxona, oshxona hamda o‘quv xonalarni ko‘zdan kechirib, mavjud kamchilik- xatolarni tuzatish yuzasidan mas’ullarga tavsiya va ko‘rsatmalar berib o‘tdi.

Shuningdek, O‘FA terma jamoalar bo‘limi boshlig‘i Usmon Toshev ayrim mavzular yuzasidan FMM murabbiylarining savollariga javob berdi va kelgusidagi ishlar yuzasidan fikr almashdilar. Uchrashuvda FMM tarbiyalanuvchilariga O‘FAning futbol to‘plari topshirildi.