“Navbahor”ning yakunlangan mavsumga oid statistik ma’lumotlari bilan tanishtirishda davom etamiz. Bu safar jamoaning Coca Cola Superliga–2021 uchrashuvlarida eng yaxshi, deb topilgan futbolchilariga to‘xtalishni lozim, deb topdik.

Mavsum–2021da “lochinlar”ning 8 nafar futbolchisi 16 ta o‘yinda O‘zbekiston Professional futbol ligasi (O‘zPFL) tomonidan uchrashuvning eng yaxshi futbolchisi, deb topilishdi, ya’ni, “Navbahor” ishtirokidagi 26 ta bahsdan faqatgina 10 tasida eng yaxshi futbolchi nomiga raqib jamoa a’zolari sazovor bo‘lishgan, xolos.

Bu boradagi ustunlik “lochinlar”ning tajribali sardori Azimjon Ahmedovga tegishli. Ahmedov “Navbahor”ning 6 ta bahsida uchrashuvning eng yaxshi o‘yinchisi deb topildi.

Jamoaning tajribali darvozaboni O‘tkir Yusupov 3 marta, tojikistonlik mahoratli yarim himoyachi Ehsoni Panshanbe 2 marta, Quvondiq Ro‘ziyev, Kosta Tenorio Guttiner, Ivan Solovyov, Igor Golban va Zabihillo O‘rinboyev esa 1 martadan eng yaxshi futbolchi nomiga sazovor bo‘lishdi.

“Navbahor” PFK matbuot xizmati.