Ayni kunlarda Qozog‘istonning Almati shahrida karatening WKF yo‘nalishi bo‘yicha Osiyo chempionati bo‘lib o‘tmoqda. Musobaqa doirasida Osiyo karate federasiyasining konferensiyasi o‘z ishini boshladi. Unda Butunjahon karate federasiyasi prezidenti Antonio Espinos, shuningdek, Osiyo karate federasiyasining birinchi vitse-prezidenti Alam Mullayev ham ishtirok etmoqda.

Ushbu tadbir kun tartibidan kelasi yil o‘tkaziladigan qit’a chempionatiga mezbonlik qiluvchi davlatni aniqlab olish masalasi o‘rin olgan edi. Ahamiyatlisi, unda Toshkent shahri kelasi yil barcha yosh toifalaridagi qit’a chempionatini qabul qiladigan bo‘ldi. Qayd etish joiz, avvalgi mezbon davlatlar o‘z yurtlaridagi epidemiologik vaziyat sabab musobaqani qabul qila olmaydigan bo‘lgan edi.

Dastlabki rejaga ko‘ra, qit’a birinchiligi Osiyo o‘yinlaridan avval o‘tkazilishi ko‘zda tutilgan. Bu esa karatechilarimiz uchun muhim start oldidan o‘ziga xos tayyorgarlik vazifasini o‘tab beradi. Eslatib o‘tamiz, Toshkent 2019 yil iyul oyida kattalar o‘rtasidagi Osiyo chempionatini qabul qilgan edi.