Shu kunlarda Bangladeshda Osiyo voleybol konfederasiyasi Markaziy zonasiga a’zo davlatlarning erkaklar va ayollar terma jamoalari o‘rtasida «Challenge cup-2021» musobaqasi bo‘lib o‘tmoqda.

Musobaqaning ochilish marosimida ishtirok etgan Bangladesh voleybol federasiyasi prezidenti va Dakka North City korporasiyasi meri janob Muhammad Atiqul Islom barcha ishtirokchi jamoalar va rasmiylarni samimiy qutlab, bahslarni ochib berdi.

Shuningdek, ochilish marosimida Markaziy Osiyo voleybol assosiasiyasi (CAVA) prezidenti janob Muhammad Latif barcha jamoalarni iliq kutib olgani va musobaqani Bangladeshda qabul qilayo‘tgani uchun mezbonlarga minnatdorlik bildirib, Bangladesh hukumatining mamlakatda voleybol sport turini rivojlantirishga qo‘shayotgan hissasini alohida e’tirof etdi.

Bevosita musobaqaga kelsak, uni O‘zbekiston ayollar terma jamoasi ko‘tarinki ruhda boshladi. Ular ilk uchrashuvda Maldiv orollari ustidan 3:0 hisobida g‘alaba qozonishdi. Keyingi ikkita o‘yinda ham g‘alaba nashidasini surgan qizlarimiz ketma-ket uchta g‘alaba bilan 9 ochko jamg‘argan holda peshqadamlik qilishmoqda. Nepal esa 8 ochko bilan 2-o‘rinni egallab turibdi. E’tiborlisi, ular ham 3ta g‘alabaga erishgan. Faqat bitta o‘yin tay-brekka qadar cho‘zilgani bizning foydamizga ishlamoqda.

Shri-Lanka ikkita g‘alaba va bitta mag‘lubiyatdan keyin 7 ochko bilan 3-o‘rinda borayotgan bo‘lsa, Qirg‘iziston bir g‘alaba va ikki mag‘lubiyatdan keyin 3 ochko bilan 4-o‘rinni egallab turibdi.

Erkaklar jamoalari o‘rtasida Bangladesh va Shri-Lanka 6tadan ochko jamg‘argan holda yetakchilik qilayotgan bo‘lsa, Nepal va O‘zbekiston hisobida bittadan g‘alaba va ikkitadan mag‘lubiyat mavjud va ular 3 ochkodan jamg‘arishgan.