Ralf Rangnikning dastlabki o‘yinlari munosib chiqmadi. Jadvalning quyi qismidagi uch jamoaga qarshi o‘yinda atigi 3 gol urildi va agar De Xea bo‘lmaganida, ancha ko‘p o‘tkazvorishiyam mumkin edi.

Katta ehtimol bilan o‘yindagi bu pasayish Rangnikning o‘zi yaxshi ko‘rgan 4-2-2-2 sxemasiga futbolchilarni moslashtirishga uringanidan yuzaga keldi.

Ronaldu uch o‘yinda atigi bir marta penaltidan gol urdi. Oldingi chiziqning har tomonida erkin harakatlanishga o‘rgangan va shu pozisiyada Yevropada eng yaxshilardan biri bo‘lgan Bruno qanotga biriktirilgach, umuman o‘ynay olmayapti - Rangnik qo‘l ostidagi o‘yinlarda u olgan o‘rtacha baho jamoada 10-ko‘rsatkich.

Ya’ni, bu sxemada ko‘p futbolchilar o‘z darajasida o‘ynay olmayaptilar. Rangnik Nyukasldagi o‘yinning ikkinchi taymida Matichni hatto uchinchi markaziy himoyachi sifati tushirdi, u paytda ham Fred, ham Maktominey maydonda bo‘lmagani uchun yarimhimoya butunlay yalang‘och bo‘lib qoldi.

Xabar berishlaricha, Erik Bayi Afrika kubogiga ertaroq tayyorlanish uchun ketishga ruxsat olgan, ammo murabbiy uning orqaga qaytarishga qaror qildi va himoyachi indinga «Byornli» bilan o‘yinga tayyor bo‘lishi lozim.

Bu nima degani? Demak, «Atletik» nashrining insaydi to‘g‘ri - Ralf 4-2-2-2 ga bog‘lanib qolmaydi, 3-4-1-2 sxemasiga o‘tishi mumkin. Bayi esa, Lindelof virusga chalingani uchun uchinchi markaziy himoyachi sifatida kerak.

Menimcha, bu sxema hozirgi MYU futbolchilariga ko‘proq mos keladi, asosiysi, Bruno yana o‘zi uchun qulay pozisiyaga qaytishi mumkin.

Ammo baribir, yo Reshford yoki Ronaldu zaxiraga o‘tirishi shart nazarimda. Ularni birgalikda maydonda ko‘rish qog‘ozda ajoyib, lekin ayni paytda jamoa muxlislarining ko‘zini qonatib yuborayotgandek.

Qahramon Aslanov.