Germaniya terma jamoasining sobiq hujumchisi Yurgen Klinsman «Tottenxem» klubini boshqarish uchun o‘z nomzodini taklif qilganini tan oldi. O‘shanda Joze Mourinyo jamoani tark etgandi va "shporlar" murabbiysiz qolishgandi. Keyinchalik ular Nunu Eshpiritu Santuni tayinlashdi, keyinroq esa Antonio Konte bosh murabbiyga aylandi.

«Nomzodlar borasida «Tottenxem» rahbariyatining boshqa rejalari bor edi. Ularning tanlovini hurmat qilish kerak. Biz Deniyel Levi bilan suhbatlashgandik. U boshqacha yo‘l bilan harakat qilish niyatida ekanligini bildirgandi.

«Tottenxem» men ishlashni xohlaydigan klubi. O‘rtamizda unutilmas lahzalar bor. Men bilgan ko‘plab insonlar u yerda mehnat qiladi. Biz hozirgacha ular bilan aloqadamiz. Shu sababli, kelajakda nima bo‘lishini hech kim bilmaydi. Bir kun kelib murabbiylikka qaytishni xohlayman. Hozir AQSHda ESPN telekanalida futbol o‘yinlarini sharhlayapman. Yevropada nimalar ro‘y berayotganini kuzatib turaman», — dedi Klinsman Four-Four-Two bilan suhbatda.

Qayd etish kerakki, Yurgen futbolchilik paytida «Tottenxem» tarkibida 68 ta uchrashuvda maydonga tushib, 38 ta gol kiritgan.