Ortda qolgan 2021 yil ham mamlakat sporti uchun eng sermahsul yillardan biri bo‘ldi, desak mubolag‘a bo‘lmaydi. Quyida tarix zarvaraqlariga muhrlangan 2021 yilning eng muhim voqeliklariga e’tibor qaratamiz.
O‘tgan yili Olimpiya, noolimpiya hamda milliy sport turlari bo‘yicha o‘tkazilgan O‘zbekiston chempionatlari, kuboklari va boshqa musobaqalarda qamrab olingan ishtirokchilar soni 53 153 nafarni tashkil etdi. Bu ko‘rsatkich joriy yilda yanada ortishi hamda 56 995 nafarga yetishi kutilmoqda.
Xalqaro sport tadbirlaridagi ishtirokchilarning soni yakuniga yetgan yilda 2 167 nafarni tashkil etgan bo‘lsa, 2022 yilda jami 2 450 nafar sportchi jahon arenalarida Vatanimiz sharafini himoya qilishi rejalashtirilgan.
Shuningdek, 2021 yil davomida sportchilarimiz tomonidan xalqaro sport musobaqalarida qo‘lga kiritilgan medallar soni 629 tani tashkil etdi. Shundan 146tasi oltin, 178tasi kumush hamda 305tasi bronza medallaridir.
2021 yilda O‘zbekistonda 35ta nufuzli xalqaro sport musobaqalari o‘tkazildi. Jumladan, mamlakatimiz ortda qolgan yilda 10ta jahon chempionati, 4ta jahon kubogi, 16ta Osiyo chempionati, 5ta xalqaro turnirga mezbonlik qilgan bo‘lsa, 2022 yilda O‘zbekistonda jami 37ta nufuzli xalqaro sport musobaqasi, xususan 12ta jahon chempionati, 2ta jahon kubogi, 20ta Osiyo chempionati va 5ta xalqaro turnirni qabul qilishi rejalashtirilgan.
Joriy yildan boshlab Paralimpiya sport turlari bo‘yicha O‘zbekiston chempionati va kubogi musobaqalari Olimpiya sport turlari bo‘yicha bo‘lib o‘tadigan Respublika sport musobaqalari bilan birgalikda o‘tkaziladi. 2022 yilda Paralimpiya sport turlari bo‘yicha 44ta Respublika sport musobaqalari, 11ta jahon chempionati va kuboklari hamda 2ta Osiyo chempionati bo‘lib o‘tadi.
