Shuhrat Maqsudov murabbiyligidagi “Bunyodkor” bugundan 2022 yilgi mavsumga tayyorgarlikni davom ettirmoqda.

“Bunyodkor” akademiyasi maydonida boshlangan bugungi mashg‘ulotlarda 20 nafar futbolchi ishtirok etdi. Shuhrat Maqsudov boshchiligidagi murabbiylar shtabi yig‘inning ilk kunidagi mashg‘ulotlarda o‘yinchilarga katta yuklamalar bergani yo‘q. Futbolchilar maydonda to‘p bilan ishladi va yengil jismoniy mashg‘ulotlarni bajarishdi. Suhrob Sultonov, Dilshod Jo‘rayev va Usmonali Ismonaliyev ko‘rikka jalb etilgan.

Jamoamiz bilan amalda shartnomasi bor Suhrob Izzatov, Odiljon Abdurahmonov, Davronjon Ergashev tez kunlarda mashg‘ulotlarga qo‘shiladi. Jarohatini davolatayotgan Rasul Yo‘ldoshev esa, bir necha kundan so‘ng umumiy guruh bilan mashg‘ulotlarni boshlaydi.

Bugun boshlangan yig‘in 2 fevralga qadar Toshkentda davom etadi. Bu muddat oralig‘ida jamoamiz oltita nazorat o‘yinida maydonga tushadi. Dastlabki raqib “Qo‘qon-1912”. Uchrashuv 15 yanvarda bo‘lib o‘tishi rejalashtirilgan. Tayyorgarlikning so‘nggi bosqichi Turkiyada o‘tkaziladi. “Bunyodkor” rejaga ko‘ra 5 fevral kuni Turkiyaga yo‘l oladi.

Bugungi mashg‘ulotlarda ishtirok etgan futbolchilar – Ravshan Yagudin, Sarvar Karimov, Zafar Safoyev, Suhrob Sultonov, Avazbek O‘lmasaliyev, Bilol Tupliyev, Jahongir Abdusalomov, Usmonali Ismonaliyev, Dilshod Jo‘rayev, Muhammadodil Qahramonov, Dian Talxatov, G‘ayrat Azizxo‘jayev, Umid Sultonov, Sanjar Rixsiboyev, Aziz Pirmuhammadov, Muzaffar Olimjonov, Xurshid Ubaydullayev, Bek Abdullayev, Alfayzi Ne’matov, Umarali Rahmonaliyev.