Ralf Rangnik “Manchester Yunayted” bosh murabbiyi lavozimiga jamoada vujudga kelgan tartibsizliklarga barham berish uchun taklif qilindi. Biroq germaniyalik mutaxassis qisqa vaqt ichida mavjud muammoni hal eta olmadi va unga yuklangan yana bir vazifa izdan chiqish xavfi ostida.
Gap shundaki, mankunianliklar rahbariyati navbatdagi transfer oynasida birinchi o‘rinda hujumchi Erling Xoland bilan muzokaralarda Rangnikning yordamiga umid qilgandi. Dastlabki ma’lumotlarga ko‘ra, nemisning aloqalari forvard va uning agenti qaroriga ta’sir qilishi kerak edi.
Ammo, “The Mirror” nashrining xabar berishicha, Xoland Ispaniya chempionatiga o‘tish niyatida. Ayni paytda u Manchesterga o‘tish variantini ko‘rib ham chiqmayapti.
