Professional boks bo‘yicha ikkinchi yarim yengil vazn (-55,34 kg) toifasida WBA va IBF kamarlari sohibi Murodjon «Kaka» Ahmadaliyevning (10-0, 7 KO) navbatdagi raqibi ma’lum bo‘ldi. Bu haqda BoxingScene xabar qilmoqda.

IBF tashkiloti Ahmadaliyev va mazkur toifada majburiy da’vogar filippinlik Marlon Tapales (35-3, 18 KO) o‘rtasidagi jangni tashkil qilish borasida qaror chiqargan. Har ikki tomon vakillariga o‘zaro kelishuvga erishish uchun 2 fevralga qadar muhlat berilgan. Agar tomonlar kelishuvga erisha olmasa, jang tashkilotchisi auksion orqali aniqlanadi.

Tapales so‘nggi jangini 2021 yil 11 dekabrida yaponiyalik Hiroaki Teshigavaraga qarshi o‘tkazib, uni ikkinchi raundda nokautga uchratgandi. Bu orqali filippinlik bokschi IBF kamari uchun majburiy da’vogarga aylangan. Avvalroq u Ahmadaliyevning sobiq raqibi Ryosuke Ivasaga imkoniyatni boy bergandi.

Ahmadaliyev so‘nggi jangini 2021 yilning 19 noyabrida Xose Velaskesga qarshi o‘tkazib, ochkolar evaziga g‘alaba qozongandi.

Qayd etish kerak, IBF qo‘ygan shartga ko‘ra, hech bir bokschi jang bo‘lib o‘tadigan sanaga qadar boshqa jang uchun shartnoma tuzishi taqiqlanadi. Bu esa Ahmadaliyevning barcha kamarlarni birlashtirish istagini ortga suradi. Shu tariqa Murodjon va WBC hamda WBO kamarlari egasi Stiven Fulton (20-0, 8 KO) o‘rtasidagi jang yaqin orada o‘tkazilmaydigan bo‘ldi. Ma’lumot uchun, 2022 yilda Fultonni ham majburiy himoya jangi kutib turibdi.