"Qo‘qon-1912" jamoasi yangi mavsumga tayyorgarlikning 2-bosqich mashg‘ulotlarini boshlashdi. Jamoamizning bu bosqichdagi mashg‘ulotlari Toshkent shahrida olib borilishi haqida avval xabar bergan edik. Kecha Toshkent shahrida yig‘ilgan futbolchilarimiz kechki payt bir mahal mashg‘ulot o‘tkazishgan bo‘lsa, bugundan mashg‘ulotlar ikki mahaldan olib boriladi. Kunning birinchi yarmida trenajyor zalida , kunning ikkinchi yarmida esa "Bunyodkor" akademiyasiga qarashli maydonda to‘p bilan mashg‘ulotlar olib boriladi.
Jamoa tarkibi asta - sekinlik bilan mukammallashtirib borilmoqda. Toshkentdagi yig‘inda jamoamizning yetakchilari Murod Xomuhammedov, Aleksandr Merzlyakov, Quvondiq Ro‘ziyev, Oybek Rustamovlar bilan birga tarkibga bir qator yangi futbolchilar ham qo‘shilishdi. Qarshining "Nasaf", Bekobodning "Metallurg" jamoalaridagi o‘yinlari bilan muxlislarga yaxshi tanish bo‘lgan yarim himoyachi Dilshod Rahmatullayev, jamoamiz muxlislariga tanish bo‘lgan yarim himoyachi Sobit Sindarov, shunigdek hujumchi San’at Shixovlar "shunqorlar"ning mashg‘ulotlarida ishtirok etishyapti.
