Dortmundning "Borussiya" klubi boshqaruvi raisi Xans-Yoaxim Vatske jamoa hujumchisi Erling Xolandning klub futbolchiga bosim o‘tkazayotgani haqidagi so‘zlariga munosabat bildirdi.
“Erling yosh yigit, u boshqalardan o‘ziga xosligi bilan ajralib turadi. Xoland bilan muammomiz yo‘q, lekin u bizning pozisiyamizni tushunishi kerak. Biz uning qarorini may oyining oxirigacha kuta olmaymiz. Erlinga hech qanday bosim o‘tkazmaymiz. Hozircha hech qanday muzokaralar yoki uchrashuvlar yo‘q, shuning uchun men uning gaplarini tushunmayapman", - deya Vatske so‘zlaridan iqtibos keltirgan "Sport1de".
Oldinroq 21 yoshli Xoland dortmundliklar norvegiyalik futbolchidan kelajagi borasida bir qarorga kelishini talab qilishini aytgandi. Futbolchiga Yevropaning bir qator top-klublari qiziqish bildirmoqda, jumladan, “Real” va “Barselona”.
