"Barselona" klubi vinger Usmon Dembele bilan shartnomani uzaytirish uchun bosim o‘tkazmoqda, deya xabar beradi "Foot Mercato".
Manba bergan xabarga ko‘ra, Kataloniya klubi dekabr oyi oxirida e’lon qilingan shartnoma taklifiga fransuzning javobini kutishdan charchagan.
Unga yiliga 20-25 million yevro maosh taklif qilishyapti, biroq yaqinda rahbariyatga futbolchining agenti Mussa Sissoko Usmon yiliga kamida 40 million yevro olmoqchi ekanligini aytdi. Bu "Barselona" uchun imkonsiz miqdor.
O‘sha uchrashuvdan so‘ng "Barsa" bosh murabbiyi Xavi Dembele bilan gaplashdi. Qayd etilishicha, 41 yoshli mutaxassis doimiy ravishda futbolchiga ovozini baland ko‘targan holda gapirgan. Xavi Usmonga taklif qilingan shartlar bo‘yicha shartnomani uzaytirishga rozi bo‘lmasa, "Barsa"da boshqa o‘ynamasligini aytdi.
Shuningdek, Dembele "Barsa"ga yon bermoqchi emasligi xabar qilingan. U o‘z shartlariga ko‘ra "Barsa" bilan shartnomasini uzaytiradi yoki yozda tekinga ketadi.
24 yoshli o‘ng qanot hujumchisi joriy mavsumda "Barselona" safida barcha turnirlarda 11 ta o‘yinda maydonga tushib, 1 ta gol urdi va 2 ta golli uzatmani amalga oshirdi.
