“Roma” bosh murabbiyi Joze Mourinyo A seriya doirasida “Kalyari” ustidan qozonilgan g‘alaba haqidagi taassurotlari bilan o‘rtoqlashar ekan, jamoasining ushbu qarama-qarshilikdagi o‘yinini tahlil qildi.
“Bu juda muhim g‘alaba. Vaziyatni nazorat qildik, ammo yana durang qayd etishimiz mumkin edi, bizni Patrisio o‘zining seyvlari bilan qutqarib qoldi. Endi bizni oldinda kuchsizroq jamoalar bilan uchrashuvlar kutib turibdi, ammo autsayderlar bilan qanday ochko yo‘qotganimizni unutganim yo‘q. Bizga Oliveyra kabi ko‘proq o‘yinchilar kerak - tajribali, yetuk, o‘yinning ma’lum daqiqalarida o‘zini qanday tutishni biladigan”, - dedi Mourinyo matbuot anjumanida.
Qo‘shimcha qilamizki, aynan Serxio Oliveyra debyut uchrashuvida penaltini golga aylantirib, rimliklarga uch ochko keltirdi. Bu hafta 29 yoshli yarim himoyachi “Portu”dan Italiyaga ko‘chib o‘tdi.
