Yangi mavsumga tayyorgarlikni Turkiyaning Antaliya shahrida olib borayotgan “Navbahor” bugun mazkur o‘quv-mashg‘ulot yig‘ini doirasidagi ikkinchi  nazorat-sinov bahsini o‘tkazdi. Bu safar jamoamizga Polshaning “Rakuv” klubi raqib bo‘ldi. Mazkur jamoa o‘tgan mavsumda Polsha chempionatida vise-chempion bo‘lgan, shuningdek, Polsha kubogini qo‘lga kiritgan.

Ayni paytda esa “Rakuv” Polsha milliy chempionatida  3-o‘rinda bormoqda. Qisqasi, “lochinlar”ga bugun Polshaning kuchli klublaridan biri raqib bo‘ldi.

Ushbu o‘yinda «Navbahor» tarkibida quyidagi futbolchilar maydonga tushishdi: Rahimjon Davronov, Davronbek Hoshimov, Igor Golban, Boyan Siger, Stanislav Andreev, Yovan Jokich, Jamshid Boltaboyev, Nurillo To‘xtasinov, Jamshid Iskanderov, Elguja Grigalashvili, Andrey Sidorov.

Zaxiradan maydonga tushganlar: Islomjon Abdullaxonov, Xurshidbek Muxtorov, Sherzod  G‘ulomjonov, Mirzohid Mirzamahmudov, Abbosjon G‘ulomov, Islom Kenjaboyev, Shohruh Mahmudhojiyev, Ibrohim G‘anixonov, Sardor Telyakov.

Mazkur bahsda polshaliklar yirik – 3:0 hisobida g‘alaba qozonishdi. Aytish lozimki, jamoalar tanaffusga 1:0 hisobida chiqib ketishgandi.

“Navbahor” ustozi Samvel Babayan  ushbu o‘yinning 2-bo‘limida yosh futbolchilarni ham maydonga tushirib, ularni sinovdan o‘tkazdi.

Eslatib o‘tamiz, “lochinlar” Turkiyadagi ilk nazorat bahsini Vengriyaning “Spartakus Niredxaza” jamoasiga qarshi o‘tkazib, 0:0 hisobida durang o‘ynashgandi.    

«Navbahor» Turkiyadagi yig‘inni ertaga yakunlab, yurtimizga qaytib keladi.

“Navbahor” PFK matbuot xizmati.