Ma’lumki, Professional futbol ligasi 2022 yilgi mavsumdan boshlab Yoshlar ligasi musobaqasiga kichik o‘zgarish kiritdi. Endi o‘rinbosarlar o‘rtasidagi uchrashuvlar oldingidek asosiy tarkib bahsidan bir kun avval emas, balki ertasi kuni o‘tkaziladi. Bu o‘zgarish liga o‘yinlariga qanchalik ijobiy ta’sir qiladi? Biz “Bunyodkor U-21” jamoasi bosh murabbiyi Abduhamid Qodirovning fikrlari bilan qiziqdik.
- PFL tomonidan 2022 yilgi mavsum uchun ishlab chiqilgan Reglamentdagi o‘zgarishni o‘qidim. Meni xursand qilgan jihat shundaki, PFL Yoshlar ligasiga ham e’tibor qaratishni boshlabdi, buning uchun ularga minnatdorchilik bildiraman. Chunki o‘zbek futboli yulduzlarining deyarli barchasi katta futbolga qadamni o‘rinbosarlar jamoasi orqali qo‘ygan. Ya’ni, Yoshlar ligasi o‘yinchilarga tramplin vazifasini o‘tab beradi.
- Ta’kidlanganidek, yoshlar ligasida qatnashadigan ayrim jamoalarning maydonlari haqiqatdan ham sifatsiz. Yangi qoidaga ko‘ra, agar maydonning holati talab darajasida bo‘lmasa o‘yin asosiy stadionda o‘tkaziladi. Bu o‘z-o‘zidan futbolchilarning o‘sishiga va albatta musobaqaning saviyasi oshishiga xizmat qiladi. Futbolning rivojida maydonning holati muhim o‘rin tutishi hech kimga sir emas.
- Yoshlar ligasi bahsi asosiy jamoalar o‘yinidan bir kun keyin o‘tkazilishi zaxirada qolib ketishi mumkin bo‘lgan futbolchilarga imkoniyat yaratadi. Eski holatda yosh iqtidor egasi asosiy tarkibda maydonga tushish ehtimoli sababli o‘rinbosarlar o‘yinida ham maydonga tusha olmas edi. Mabodo asosiy tarkibda ham o‘ynamasa futbolchi o‘yin amaliyotisiz qolib ketardi. Bu o‘z-o‘zidan yosh iqtidorning holatiga salbiy ta’sir qilardi. Endi bunday bo‘lmaydi. Asosiy tarkibda maydonga tushgan yosh futbolchi ertasi kuni dam oladi. Tabiiyki, uning yoshlar ligasidagi o‘rni boshqa iqtidor bilan to‘ldiriladi.
