"Paxtakor" futzal jamoasi oliy liga 6-turida AGMK va "Lokomotiv" kabi kuchli jamoalar bilan to‘qnashib, mag‘lubiyatga uchramadi.

Dastlabki bellashuvda "Nasaf" bilan to‘qnash kelgan Shuhrat Toshmedov shogirdlari keskin kechgan bahsda 5:3 hisobida zafar quchishdi. O‘yin oxirlarida Feruz Faxriddinov va Konstantin Sviridov tomonidan urilgan gollar jamoamizga g‘alaba keltirdi.

Ikkinchi bahsda tur mezboni AGMKga qarshi uchrashuvda futzalchilarimiz iroda ko‘rsatishdi. Hisobda ikki to‘p farqi bilan ortda borgan jamoamiz ikkinchi bo‘limda muvozanatni tikladi. Muhammad Zoirov, Sherzod Mustafoyev va Konstantin Sviridov raqib darvozasiga kiritilgan to‘plar muallifi bo‘ldi.

Uchinchi bellashuvda "Lokomotiv" bilan 2:2 hisobida durang natija qayd etildi. Bu safar ham Sviridov o‘yin oxirida gol urib, jamoamizga bir ochko taqdim etdi. 16 bahsda 33 ochko to‘plagan "Paxtakor" turnir jadvalida 4-o‘rinni egallab turibdi.

"PAXTAKOR" - "NASAF" - 5:3 (3:2)
Gollar: Zoirov 4, 16, Faxriddinov 9, 36, Sviridov 38 - Halimov 2, Polvonov 19, 23.

AGMK - "PAXTAKOR" - 3:3 (2:1)
Gollar: Abdurahmonov 2, Abduvaliyev 9, Ibrohimov 27 - Zoirov 19, Mustafoyev 27, Sviridov 30.

"LOKOMOTIV" - "PAXTAKOR" - 2:2 (1:0)
Gollar: Zoirov 10-avt, Usmonov 38 - Mojayev 27, Sviridov 40.