Xabar berganimizdek, bugun poytaxtimizda 22 yoshgacha bo‘lgan o‘g‘il-qizlar o‘rtasida boks bo‘yicha qit’a birinchiligi start oldi. Quvonarlisi, musobaqani hamyurtlarimiz chiroyli g‘alaba bilan boshlashdi.

Bugun bellashuvlar boshlanishidan avval musobaqaning tantanali ochilish marosimi bo‘lib o‘tdi. Unda Xalqaro boks assosiasiyasi prezidenti Umar Kremlyov, Osiyo boks konfederasiyasi prezidenti Anas Alotaiba, MOQ raisi o‘rinbosari, O‘zbekiston boks federasiyasi raisining birinchi o‘rinbosari Saken Polatov so‘z olib, bugungi murakkab epidemiologik vaziyatga qaramay musobaqani tashkil etishda har tomonlama yordam bergan hukumatimizga minnatdorchilik bildirishdi va ishtirokchilarga omad tilab o‘tdilar. Shuningdek, tadbirda Turizm va sport vazirligi hamda MOQ mutasaddilari ham ishtirok etishdi.

Shundan so‘ng tadbirning badiiy qismiga navbat berildi. Unda san’atimizning taniqli vakillari kuy-qo‘shiqlari, raqslari bilan yig‘ilganlarga ko‘tarinki kayfiyat ulashdi.

Marosim yakuniga yetgach, qizg‘in bellashuvlar ham boshlanib ketdi. Bugun -67 kg vazn toifasida Javlonbek Yo‘ldoshev bokschilarimiz orasida birinchi bo‘lib ringga ko‘tarildi. Saudiyalik raqibiga qarshi jang qilgan Javlonbek muxlislarimizga chiroyli g‘alaba taqdim qildi va keyingi davraga yo‘l oldi.