Angliyaning «Kristal Pelas» klubi bosh murabbiyi Patrik Viyeyra APL doirasida«Liverpul» (1:3) jamoasiga qarshi o‘yinni boshqargan hakamlarni tanqid qildi.

«Liverpul» – juda yaxshi jamoa ekanligini bilardik. Nima kutish kerakligini juda yaxshi bilardik. Birinchi bo‘limda ular bizdan ko‘ra ancha yaxshi o‘yin namoyish etishdi. Biz juda katta qiyinchilikka duch keldik. Ular o‘yin mobaynida hamma narsani nazorat qilishdi va biz ularga bosim o‘tkazadigan yo‘llarni topa olmadik.

Ikkinchi bo‘limda o‘z o‘yinimizni namoyish etishga harakat qildik va raqibga bosim o‘tkazishni boshladik. Ular jismoniy tarafdan charchab qolishdi va biz gol kiritishni uddasidan chiqdik. Bu bizga qo‘shimcha kuch berdi va o‘yin tempini oshirdik.

Keyin esa penalti belgilandi. Hakamning xatosi o‘yinga katta ta’sir o‘tkazdi. U qabul qilgan qarorlarini tushuntirib berishi kerak.

Fikrimcha, Jota juda aqlli o‘ynadi. Kontakt – futbolning mohiyati. Hakamlar bilan uchrashuvlar o‘tkazilgandi va ular bizga kontakt – futbolning mohiyati ekanligini tushuntirishgandi. Hozir esa bular barchasini aksincha bajarishdi. Ularning qarorlaridan g‘azablandim. O‘sha vaziyatni bir necha marta takroran tomosha qildik. Hech qanaqasiga penalti yo‘q edi.

Biz gol kiritgan paytimizda tashabbus biz tomonga o‘tgan edi. Hisobni tenglashtirishimiz mumkin edi. Ammo, hakam bugun bizni "o‘ldirdi", – dedi Viyeyra.