«Milan» yarimhimoyachisi Frank Kessi joriy transfer oynasida «Tottenxem»ga o‘tishdan bosh tortdi, deb xabar beradi Calciomercato.
Manbaga ko‘ra, klublar ivuarlik futbolchining transferi bo‘yicha kelishib olgan, ammo Kessi «Tottenxem»ga o‘tishni rad etgan. Yarimhimoyachi mavsumning qolgan qismini «Milan»da o‘tkazib, chempionlik uchun kurashmoqchi.
Kessining «Milan» bilan shartnomasi kelasi yil yozida tugaydi, tomonlar avvalroq shartnomani uzaytirish bo‘yicha kelisha olishmadi, chunki Frank klub taklif qilgan shartlardan qoniqmayapti.
Joriy mavsumda Kessi Italiya A seriyasida «Milan» safida 16 ta o‘yinda maydonga tushdi va 5 ta gol urdi.
