Rossiya. «Ufa» bosh direktori Shamil Gazizovning «SE» nashriga ma’lum qilishicha, hamyurtimiz Oston O‘runov jarohat asoratlari tufayli mashg‘ulotlarda qatnashmayapti. Lekin jamoa murabbiylarining yarim himoyachidan umidlari katta. «O‘runov mashg‘ulotlarda ko‘rinmayapti? Eng muhimi, uni maydonda ko‘rish. Oston kuzda jarohatlangan edi. Umid qilamizki, uni yaqin orada rasmiy o‘yinlarda ko‘ramiz. Chempionat boshlanishiga qadar safga qaytishi mumkinmi? Albatta. To‘g‘ri, hali ishlashimiz kerak», - dedi Gazizov. O‘runov RPL 16-turidan o‘rin olgan «Spartak»ga qarshi o‘yinda jarohatga yo‘liqqandi. Umuman, 21 yoshli legionerimiz joriy mavsum «Ufa»ning 7ta o‘yinida maydonga tushdi.
Saudiya Arabistoni. Mamlakat Premyer-ligasi 18-turidan o‘rin olgan «At-Taavun» - «An-Nasr» o‘yini taqdirini yagona gol hal qildi. Diqqatga sazovor tomoni, uchrashuvning 77-daqiqasida zaxiradan maydonga tushgan Jaloliddin Masharipov «Nasr»ga g‘alaba keltirgan golda katta rol bajardi. Ya’ni aynan hamyurtimiz jarima nuqtasidan uzatmani amalga oshirgach, Taliska boshi bilan zarba yo‘lladi va to‘p himoyachiga tegib, darvozadan joy oldi - avtogol.
Qozog‘iston. O‘zbekiston milliy jamoasi hujumchisi Igor Sergeev «Tobol»dagi faoliyatini davom ettiradi. Buni futbolchining agenti Ro‘zimurod Usmonov rasman tasdiqladi: «Igor «Tobol» bilan shartnomasi muddatini uzaytirdi, u klub bilan Yevropada muvaffaqiyat qozonish niyatida». Eslatma, hamyurtimiz 2021 yilgi mavsumda Qozog‘iston chempioni bo‘ldi.
Italiya. «Roma» Italiya kubogi 1/8 finalida «Lechche»ni 3:1 hisobida dog‘da qoldirdi. Rim jamoasining 3-goliga Eldor Shomurodov mualliflik qildi. O‘yinga 64-daqiqada qo‘shilgan hamyurtimizning harakatlari 7,4 ballga loyiq topildi («Roma» vakillari orasida 5-natija). Umuman, bu qatorasiga 8ta o‘yinda zaxiradan tushgan Shomurodov uchun «Roma» safida Italiya kubogida urilgan birinchi goldir. «Bo‘rilar» endi 1/4 finalda «Inter»ga qarshi o‘ynashadi. Shomurodov kubok bahsida yaxshi o‘ynaganiga qaramay, «Empoli»ga qarshi kechgan bahs (4:2)da zaxirada qoldirildi.
Belarus. «Energetik-BGU» Soligorskning «Shaxtyor» jamoasiga qarshi kechgan o‘rtoqlik o‘yinida hamyurtimiz Bobur Abduxoliqov qayd etgan «dubl» evaziga g‘alaba qozondi - 4:2. Alohida aytish kerak, yaqindagina «talabalar» bilan shartnomasi muddatini uzaytirgan legionerimiz Belarusning amaldagi chempioni darvozasini qandaydir 3 daqiqa ichida ikki marta nishonga oldi.
