«Fiorentina» muxlislari Dushan Vlaxovichning «Yuventus»ga o‘tishi haqidagi xabardan so‘ng unga tahdid qila boshladi.

Yarim tunda «Fiorentina» uy o‘yinlarini o‘tkazadigan «Artemio Franki» stadioni atrofida bir qancha haqoratlovchi bannerlar paydo bo‘ldi.

Unda: «Hurmat gollar bilan qozonilmaydi. Vlaxovich — jirkanch gorbun (bukur — ‘Yuventus’ futbolchilari va muxlislarining laqabi)», «Qo‘riqchilaring hayotingni qutqarib qololmaydi. Lo‘li, sen uchun hammasi tugadi!», «Tez orada ko‘rishamiz, yomon bola», «Vlaxovich — esipast», «Vlaxovich — esipast lo‘li» kabi jumlalar yozilgan edi.

Shundan so‘ng polisiya Vlaxovichning uyi oldida tezkor kuzatuvni yo‘lga qo‘ydi va u istiqomat qiladigan uy muntazam ravishda nazorat qilinmoqda. Xabarga ko‘ra, futbolchi shikoyat qilmagan, polisiyaning o‘zi shaxsiy tashabbusi bilan bu ishga qo‘l urgan.

Avvalroq Dushan Vlaxovichning «Yuventus»ga o‘tishi mumkinligi, futbolchi allaqachon Turin klubi bilan shaxsiy kelishuvga erishganligi xabar qilingan edi.