Qishning eng yaxshi transferi, menimcha, Kristian Eriksenning “Brentford”ga o‘tishi, ya’ni APLga, futbolga qaytishi. “A Seriya” qoidalariga ko‘ra, yurak defibrillyatori bilan o‘ynash mumkin emas, Angliyada esa, bunday cheklov yo‘q.

Bu transferda har tomondan e’tiborga arzirli jihat bor. Emosional nuqtai nazardan – Eriksen yozda Yevro o‘yinida bir o‘limdan qolgan edi. Shunday hikoya bilan yana maydonga qaytish ajoyib voqea.

Ikkinchidan, “Brentford” APLdagi eng “daniya” klub. Tarkibda yetti nafar daniyalik futbolchi bor, shuningdek, bosh murabbiy Tomas Frank ham o‘sha yerdan. Murabbiy Eriksen bilan eng boshidan tanish – futbolchi 2008-09 yillarda Daniya o‘smirlar terma jamoasida to‘p surgan paytlarda aynan Tomas Frank jamoani boshqargan. Ushbu transferda hal qiluvchi rollardan birini aynan shu faktor o‘ynagan bo‘lishi shubhasiz.

Va uchinchidan, agar futbol, uslub nuqtai nazaridan qaralsa, “Brentford” Eriksen uchun eng teskari jamoa bo‘lishi kerak. Eriksen ko‘proq “Siti”, “Arsenal” yoki “Brayton” kabi tashabbuskor va qisqa paslar bilan o‘ynaydigan jamoalarga mos keladigandek. “Brentford” esa, jismoniy kurash, tezlik va standart vaziyatlarni o‘ziga qurol qilib olgan. Eng qizig‘i ham shunda – Eriksen jamoaga aynan yetishmayotgan jihatni taqdim etishi lozim. O‘yin tempini boshqarish, aql qo‘shish, jamoa o‘yinini to‘g‘ri yo‘naltirish borasida Eriksen juda mohir futbolchi. Ya’ni uslubga mos bo‘lmaslik aksincha, jamoaga ko‘proq foyda keltirishi va o‘yinni muvozanatga keltirishi mumkin.

“Brentford” mavsumni yaxshi boshlaganda, ko‘p raqiblar jamoani to‘g‘ri baholay olmagan, qaysidir ma’noda syurpriz bo‘lgandi. Keyin esa, hamma o‘rganib oldi, “Brentford”da pasayish kuzatildi – oxirgi 8 o‘yinda 7 mag‘lubiyat. Tajribali futbolchini taklif qilishning ayni vaqti.

“Brentford” standart vaziyatlardan unumli foydalanish va xavf yaratish borasida APL da yetakchi sanaladi. Eriksen esa, standart vaziyatlar ustasi, bu ham ayni muddao.

Qahramon Aslanov.