Қишнинг энг яхши трансфери, менимча, Кристиан Эриксеннинг “Брентфорд”га ўтиши, яъни АПЛга, футболга қайтиши. “А Серия” қоидаларига кўра, юрак дефибриллятори билан ўйнаш мумкин эмас, Англияда эса, бундай чеклов йўқ.

Бу трансферда ҳар томондан эътиборга арзирли жиҳат бор. Эмоционал нуқтаи назардан – Эриксен ёзда Евро ўйинида бир ўлимдан қолган эди. Шундай ҳикоя билан яна майдонга қайтиш ажойиб воқеа.

Иккинчидан, “Брентфорд” АПЛдаги энг “дания” клуб. Таркибда етти нафар даниялик футболчи бор, шунингдек, бош мураббий Томас Франк ҳам ўша ердан. Мураббий Эриксен билан энг бошидан таниш – футболчи 2008-09 йилларда Дания ўсмирлар терма жамоасида тўп сурган пайтларда айнан Томас Франк жамоани бошқарган. Ушбу трансферда ҳал қилувчи роллардан бирини айнан шу фактор ўйнаган бўлиши шубҳасиз.

Ва учинчидан, агар футбол, услуб нуқтаи назаридан қаралса, “Брентфорд” Эриксен учун энг тескари жамоа бўлиши керак. Эриксен кўпроқ “Сити”, “Арсенал” ёки “Брайтон” каби ташаббускор ва қисқа паслар билан ўйнайдиган жамоаларга мос келадигандек. “Брентфорд” эса, жисмоний кураш, тезлик ва стандарт вазиятларни ўзига қурол қилиб олган. Энг қизиғи ҳам шунда – Эриксен жамоага айнан етишмаётган жиҳатни тақдим этиши лозим. Ўйин темпини бошқариш, ақл қўшиш, жамоа ўйинини тўғри йўналтириш борасида Эриксен жуда моҳир футболчи. Яъни услубга мос бўлмаслик аксинча, жамоага кўпроқ фойда келтириши ва ўйинни мувозанатга келтириши мумкин.

“Брентфорд” мавсумни яхши бошлаганда, кўп рақиблар жамоани тўғри баҳолай олмаган, қайсидир маънода сюрприз бўлганди. Кейин эса, ҳамма ўрганиб олди, “Брентфорд”да пасайиш кузатилди – охирги 8 ўйинда 7 мағлубият. Тажрибали футболчини таклиф қилишнинг айни вақти.

“Брентфорд” стандарт вазиятлардан унумли фойдаланиш ва хавф яратиш борасида АПЛ да етакчи саналади. Эриксен эса, стандарт вазиятлар устаси, бу ҳам айни муддао.

Қаҳрамон Асланов.