Bugun O‘zbekiston futbol assosiasiyasi va Niderlandiya qirolligi futbol ittifoqi o‘rtasida onlayn uchrashuv bo‘lib o‘tdi. Unda O‘FA rahbariyati hamda niderlandiyalik mutaxassislar murabbiylar ta’limi va zamonaviy futbol texnologiyalari borasida o‘zaro fikr almashdilar.

Uchrashuvda niderlandiyalik mutaxassislar tomonidan futbolchilarni tayyorlash bo‘yicha “Rinus” innovasion dasturi haqida ma’lumot berildi. Ushbu dastur ko‘plab mamlakatlarda bolalar futbolini rivojlantirishda keng foydalanib kelinadi. Xususan, birgina Niderlandiyaning o‘zida 34 mingdan ortiq murabbiy mazkur platforma asosida mashg‘ulotlarni tashkil etadi.

Dasturda mashg‘ulot jarayoniga oid 7000 dan ortiq maxsus qo‘llanmalar mavjud. Bolalar-o‘smirlar jamoalarining har bir murabbiyi ushbu sport texnologiyalari yordamida deyarli butun mashg‘ulot jarayonini nazorat qilishi va boshqarishi mumkin bo‘ladi.

Shuningdek, “Rinus” platformasi murabbiylarni tayyorlashda bir qator afzalliklarga ega ekanligi e’tirof etildi. O‘z o‘rnida O‘FA rahbariyati ham yangi platformaga qiziqish bildirdi. Har bir bolalar-o‘smirlar murabbiylari mazkur platformani chuqur o‘rganishlari kerakligi aytildi. Tizimni futbolimizga bosqichma-bosqich joriy etish bo‘yicha mas’ullarga ko‘rsatma berildi.

Uchrashuvda, Niderlandiya tajribasidan kelib chiqib, mamlakat futbolining muvaffaqiyati avvalo bolalar-o‘smirlar futboliga bog‘liqligi, yosh futbolchilarni tanlab olish va ularni tarbiyalash uchun yillar davomida tizimli ish olib borish muhim ekanligini aytib o‘tildi. Tomonlar kelajakdagi istiqbolli loyihalarni birgalikda amalga oshirishga doimo tayyor ekanligini ta’kidladilar.