Бугун Ўзбекистон футбол ассоциацияси ва Нидерландия қироллиги футбол иттифоқи ўртасида онлайн учрашув бўлиб ўтди. Унда ЎФА раҳбарияти ҳамда нидерландиялик мутахассислар мураббийлар таълими ва замонавий футбол технологиялари борасида ўзаро фикр алмашдилар.
Учрашувда нидерландиялик мутахассислар томонидан футболчиларни тайёрлаш бўйича “Ринус” инновацион дастури ҳақида маълумот берилди. Ушбу дастур кўплаб мамлакатларда болалар футболини ривожлантиришда кенг фойдаланиб келинади. Хусусан, биргина Нидерландиянинг ўзида 34 мингдан ортиқ мураббий мазкур платформа асосида машғулотларни ташкил этади.
Дастурда машғулот жараёнига оид 7000 дан ортиқ махсус қўлланмалар мавжуд. Болалар-ўсмирлар жамоаларининг ҳар бир мураббийи ушбу спорт технологиялари ёрдамида деярли бутун машғулот жараёнини назорат қилиши ва бошқариши мумкин бўлади.
Шунингдек, “Ринус” платформаси мураббийларни тайёрлашда бир қатор афзалликларга эга эканлиги эътироф этилди. Ўз ўрнида ЎФА раҳбарияти ҳам янги платформага қизиқиш билдирди. Ҳар бир болалар-ўсмирлар мураббийлари мазкур платформани чуқур ўрганишлари кераклиги айтилди. Тизимни футболимизга босқичма-босқич жорий этиш бўйича масъулларга кўрсатма берилди.
Учрашувда, Нидерландия тажрибасидан келиб чиқиб, мамлакат футболининг муваффақияти аввало болалар-ўсмирлар футболига боғлиқлиги, ёш футболчиларни танлаб олиш ва уларни тарбиялаш учун йиллар давомида тизимли иш олиб бориш муҳим эканлигини айтиб ўтилди. Томонлар келажакдаги истиқболли лойиҳаларни биргаликда амалга оширишга доимо тайёр эканлигини таъкидладилар.
