«Manchester Yunayted» bosh murabbiyi Ralf Rangnik Angliya kubogining 1/16 final bosqichida bo‘lib o‘tgan «Midlsbro»ga qarshi o‘yin borasida o‘z fikrini bildirib o‘tdi. Eslatib o‘tamiz, uchrashuvning asosiy vaqtida 1:1 hisobi qayd etilgan bo‘lsa, penaltilar seriyasida mehmonlar 8:7 hisobida g‘alaba qozonishdi.

Bundan tashqari, Chimpionship vakili bahsning 64-daqiqasida hisobni tenglashtiruvchi golni urgan paytda to‘p futbolchi Dankan Uotmorning qo‘liga tekkandi. Ammo hakam videotakrorni tomosha qilgach, golni bekor qilmadi.

«Juda hafsalam pir bo‘ldi. Biz birinchi bo‘limning o‘zidayoq o‘yin taqdirini hal qilib qo‘yishimiz kerak edi. To‘sinlar, ustunlar, amalga oshirilmagan penalti va ko‘plab vaziyatlar. Hisob 2:0 yoki 3:0 bo‘lishi kerak edi. Biz inobatga olinishi kerak bo‘lmagan golni o‘tkazib yubordik. Raqib to‘pni qo‘li bilan o‘ynagandi. VAR bu golni bekor qilishiga ishonchim komil edi. Bu o‘yinda g‘alaba qozonishimiz shart edi», — dedi Rangnik.