Milan shahrining ikki shonli klubi tarkibida to‘p surganlar orasida mashhur hamda suyukli futbolchilar juda ko‘p. Muxlislar ichida esa «Milan» yoki «Inter» o‘rtasida qay biri kuchli ekani doimo munozaralarga sabab bo‘lgan. Ushbu klublardagi faoliyatida bilan mashhur bo‘lganlar orasida Uesli Sneyder hamda Kaka ham bor. Afsuski, bu juftlik hech qachon Milan derbisida to‘qnashmagan. Kaka «Real»ga yo‘l olganida, Sneyder «Bernabeu»ni tark etayotgan edi. Shunga qaramay, biz ushbu ikki afsonani bir-biriga qarshi qo‘ya oldik. Xo‘sh, ular orasida qay biri kuchliroq, qay biri yaxshiroq natijalar egasiga aylangan? Quyida siz bilan ushbu savollarga bir nechta aspektlar misolida javob izlaymiz.
1. Italiyadagi rekord
Sizga Kaka atigi bir marotaba A seriya g‘olibi bo‘lgan desak, ishonasizmi? Balki ishonmassiz, lekin shunday. U umrida bir marta «Milan» safida mavsumni birinchi o‘rinda yakunlagan. Bir marta esa, beshinchi pog‘onada. U Skudettoga bir marta ega chiqqani kabi, UYEFA kubogi musobaqasida ham bir marta o‘ynagan, xolos. Bu borada Sneyder yaxshiroq natijaga ega.
Garchanda Italiyada Kakadan ikki yarim yil kamroq o‘ynagan bo‘lsada, niderlandiyalik futbolchida Kakanikiga qaraganda ko‘proq sovrinlar jamg‘armasi mavjud. Sneyder «Inter» bilan oltita titul yutgan bo‘lsa, Kaka «Milan» safida beshta sovrinni qo‘lga kiritgan. Shu sababdan bu bobni Sneyder egallaydi.
2. Gollar va assistlar
Kakaning maydondagi harakatlariga «Braziliyalik daholar» deb nomlangan maqolada ham alohida to‘xtalib o‘tgan edik. Haqiqatdan ham braziliyalikning o‘yini, aniqlik hamda nafislik ustiga qurilar edi. Kaka jamoasiga har tomonlama yordam bergan. Shunga yarasha, uning gollar hamda assistlar statistikasi juda ham yaxshi. U «rossonerilar» tarkibida ajralib turar, o‘z davrining eng yaxshilari bo‘lmish, Ronaldinyo hamda Lempard bilan bemalol raqobatlasha olardi.
Bu borada Sneyder unchalik ham maqtana olmaydi. Chunki uning o‘yiniga natija tomonlama emas, vizuallik bilan boqish o‘rinliroqdir. Sneyder o‘ninchi raqamlarga xos tarzda gollarni qalashtirib tashlay olmagan. Buni uning «Inter» safidagi maksimal natijasidan bilib olsak ham bo‘ladi. Bu ko‘rsatkich esa to‘qqiztaga teng. Ya’ni, Sneyder bir mavsumda ko‘pi bilan to‘qqizta gol ura olgan, xolos. Shunday ekan, g‘olib – Kaka.
3. Jarima zarbasi ijrochiligi
Bu borada bechora Kakaning aybi shundan iborat ediki, u o‘z davrining eng zo‘r futbolchilaridan biri bo‘lishiga qaramay, «Milan»da jarima zarbalari ustasi bilan jamoadosh bo‘lgan. U yerda hech bir o‘yinchi Andrea Pirlodan o‘ta olmagan!
Kaka raqib darvozasi qarshisida eng katta xavflardan bo‘lishi mumkindir, ammo Sneyder jahonning eng yetakchi standart vaziyatlar mutaxassisi edi. Shuning uchun niderlandiyalik iste’dodni bu aspektning g‘olib deb e’lon qilishga majburmiz.
4. Sovrinlar jamg‘armasi
Aminmizki, qancha zamonlar o‘tmasin, Kaka hamda Sneyder futbol daholari sifatida eslanadi. Chunki ular o‘z davrining yorqin yulduzlari edi. Ularning har ikkisi YECHL bosh sovrini hamda Yevropaning har xil davlatlari chempionligini qo‘lga kiritgan. Biroq bu yerda faoliyatlar orasidagi kichik tafovut mavjud: Kaka Jahon chempioni nomini qo‘lga kiritgan, shuningdek, «Oltin to‘p» sohibiga aylangan. Sneyder esa ushbu sovrinlarga juda yaqin kelgan-u, lekin nasib qilmagan. U Jahon chempionati finalchisiga aylangan. Fenomenal o‘tkazgan mavsumlarida «Oltin to‘p»ga nomzodi qo‘yilgan. O‘shanda ko‘pchilik uni bu sovrinni qo‘lga kiritishi kerak edi, deb hisoblardi. Afsuski, omad Sneyder tarafda emasdi...
G‘olib nomi esa aniq – Kaka!
ingliz tilidan Jaloliddin ISMATOV tarjimasi
