Yangi mavsumda o‘z oldiga jiddiy maqsadlarni qo‘ygan “Navbahor” tarkibini kuchaytirishda davom etmoqda. Mahoratli yarim himoyachi Asad Sobirjonov  ikkinchi Turkiya safari oldidan klub bilan shartnoma imzoladi.

Qirg‘izistonning “Oloy” (Osh) jamoasiga qarshi kechgan 3 fevral kungi xalqaro o‘rtoqlik uchrashuvining 2-bo‘limida zaxiradan maydonga tushgan mazkur futbolchi 2000 yilning 3 avgustida Sirdaryo viloyatining Yangiyer shahrida tug‘ilgan. Faoliyati davomida “Paxtakor – U-21” yoshlar (Toshkent, 2018 yil), “Buxoro” (Buxoro, 2019 yil), “Paxtakor” (Toshkent, 2020 yil) va “Qo‘qon-1912” (Qo‘qon, 2021 yil) jamoalarida o‘ynagan.

Asad Sobirjonov shu kungacha Coca Cola Superliga bahslarida 56 ta o‘yinda maydonga tushib, 3 ta gol urgan hamda 5 ta golga assistentlik qilgan.

Shuningdek, 21 yoshli yarim himoyachi O‘zbekiston kubogi doirasidan o‘rin olgan 3 ta, Osiyo Chempionlar Ligasi (OCHL)dagi 2 ta o‘yinlarda maydonga tushgan.

Bundan tashqari, yosh futbolchi O‘zbekiston – U-21, O‘zbekiston – U-23 terma jamoalarida ham to‘p tepgan.  

Biz yangi mavsumda Asad Sobirjonovga “Navbahor” safidagi uchrashuvlarda omad yor bo‘lib, chiroyli o‘yinlari va gollari bilan “lochinlar”ning g‘alabalariga munosib hissasini qo‘shishiga tilakdoshmiz.