Янги мавсумда ўз олдига жиддий мақсадларни қўйган “Навбаҳор” таркибини кучайтиришда давом этмоқда. Маҳоратли ярим ҳимоячи Асад Собиржонов  иккинчи Туркия сафари олдидан клуб билан шартнома имзолади.

Қирғизистоннинг “Олой” (Ош) жамоасига қарши кечган 3 февраль кунги халқаро ўртоқлик учрашувининг 2-бўлимида захирадан майдонга тушган мазкур футболчи 2000 йилнинг 3 августида Сирдарё вилоятининг Янгиер шаҳрида туғилган. Фаолияти давомида “Пахтакор – U-21” ёшлар (Тошкент, 2018 йил), “Бухоро” (Бухоро, 2019 йил), “Пахтакор” (Тошкент, 2020 йил) ва “Қўқон-1912” (Қўқон, 2021 йил) жамоаларида ўйнаган.

Асад Собиржонов шу кунгача Coca Cola Суперлига баҳсларида 56 та ўйинда майдонга тушиб, 3 та гол урган ҳамда 5 та голга ассистентлик қилган.

Шунингдек, 21 ёшли ярим ҳимоячи Ўзбекистон кубоги доирасидан ўрин олган 3 та, Осиё Чемпионлар Лигаси (ОЧЛ)даги 2 та ўйинларда майдонга тушган.

Бундан ташқари, ёш футболчи Ўзбекистон – U-21, Ўзбекистон – U-23 терма жамоаларида ҳам тўп тепган.  

Биз янги мавсумда Асад Собиржоновга “Навбаҳор” сафидаги учрашувларда омад ёр бўлиб, чиройли ўйинлари ва голлари билан “лочинлар”нинг ғалабаларига муносиб ҳиссасини қўшишига тилакдошмиз.