Bugun O‘FA rahbariyati va hududiy futbol assosiasiyalar ishtirokida onlayn video anjuman bo‘lib o‘tdi. Kun tartibiga ko‘ra, dastlab futbolimizga tamal toshi qo‘yilgan sana — o‘zbek futbolining 110 yilligiga tayyorgarlik ko‘rish va uni munosib nishonlash borasida fikr almashildi. Mazkur sanaga bag‘ishlab har bir hududda bolalar-o‘smirlar, yoshlar va faxriylar o‘rtasida futbol musobaqalari va tadbirlarini o‘tkazish, ularni ommaviy axborot vositalari orqali doimiy yoritib borish bo‘yicha aniq chora-tadbirlar belgilandi. Bundan tashqari, hududlarda futbol tarixini o‘rganish, faxriy futbolchilar, ularning erishgan yutuqlari va natijalari to‘g‘risidagi ma’lumotlarni o‘rganib, ularni taqdirlash bo‘yicha taklif kiritish vazifasi qo‘yildi.

Shuningdek, futbolni ommaviyligini oshirish yuzasida hududlarda musobaqalarni ko‘paytirish, ularning saviyasini oshirish, ayniqsa bolalar-o‘smirlar musobaqalarini tizimli tashkil qilish bo‘yicha qilinayotgan ishlar yuzasidan masullar hisoboti muhokama qilindi. Joriy yildan boshlab barcha hududda “Hududiy bolalar ligasi” musobaqasini o‘tkazish bo‘yicha topshiriq berildi.

Xalq ta’limi vazirligi bilan birgalikda “Maktabda futbol” loyihasini amalga oshirish va uning aniq rejasini tuzish, “sinfga sinf”, “maktabga maktab” o‘yinlarini tashkil etish, shuningdek, futbolga qiziqishi yuqori va layoqatli jismoniy tarbiya o‘qituvchilarini murabbiylik ta’limi bo‘yicha “C” lisenziyasiga o‘qitish yuzasidan ko‘rsatmalar berildi.

Hududlarda namunali tarzda faoliyat olib borayotgan, akademiyalar va viloyat terma jamoalariga futbolchi yetishtirib berayotgan bolalar-o‘smirlar sport maktablari hamda ayollar futboli murabbiylarga imtiyozli tarzda ta’lim berish yuzasidan mas’ullarga topshiriq berildi.