Бугун ЎФА раҳбарияти ва ҳудудий футбол ассоциациялар иштирокида онлайн видео анжуман бўлиб ўтди. Кун тартибига кўра, дастлаб футболимизга тамал тоши қўйилган сана — ўзбек футболининг 110 йиллигига тайёргарлик кўриш ва уни муносиб нишонлаш борасида фикр алмашилди. Мазкур санага бағишлаб ҳар бир ҳудудда болалар-ўсмирлар, ёшлар ва фахрийлар ўртасида футбол мусобақалари ва тадбирларини ўтказиш, уларни оммавий ахборот воситалари орқали доимий ёритиб бориш бўйича аниқ чора-тадбирлар белгиланди. Бундан ташқари, ҳудудларда футбол тарихини ўрганиш, фахрий футболчилар, уларнинг эришган ютуқлари ва натижалари тўғрисидаги маълумотларни ўрганиб, уларни тақдирлаш бўйича таклиф киритиш вазифаси қўйилди.
Шунингдек, футболни оммавийлигини ошириш юзасида ҳудудларда мусобақаларни кўпайтириш, уларнинг савиясини ошириш, айниқса болалар-ўсмирлар мусобақаларини тизимли ташкил қилиш бўйича қилинаётган ишлар юзасидан масуллар ҳисоботи муҳокама қилинди. Жорий йилдан бошлаб барча ҳудудда “Ҳудудий болалар лигаси” мусобақасини ўтказиш бўйича топшириқ берилди.
Халқ таълими вазирлиги билан биргаликда “Мактабда футбол” лойиҳасини амалга ошириш ва унинг аниқ режасини тузиш, “синфга синф”, “мактабга мактаб” ўйинларини ташкил этиш, шунингдек, футболга қизиқиши юқори ва лаёқатли жисмоний тарбия ўқитувчиларини мураббийлик таълими бўйича “C” лицензиясига ўқитиш юзасидан кўрсатмалар берилди.
Ҳудудларда намунали тарзда фаолият олиб бораётган, академиялар ва вилоят терма жамоаларига футболчи етиштириб бераётган болалар-ўсмирлар спорт мактаблари ҳамда аёллар футболи мураббийларга имтиёзли тарзда таълим бериш юзасидан масъулларга топшириқ берилди.
