OFK ayollar futboli qo‘mitasi bir necha muhim qarorlarni tasdiqladi. Birinchidan, endilikda turnirlarga qur’a tashlash jarayonida jamoalarning avvalgi musobaqalardagi natijasi emas, FIFA reytingi inobatga olinadi. Agar Osiyo kubogi-2022 saralashiga qur’a tashlashda ham FIFA reytingidan foydalanilganida, O‘zbekiston termasi birinchi savatchadan joy olardi va misol uchun, J.Koreya jamoasiga duch kelmasdi.
Ikkinchidan, klublar o‘rtasida turnir o‘tkazish harakati tasdiqlandi. Allaqachon 2ta sinov musobaqa tashkillashtirildi - 2019 va 2021 yillarda. Joriy yilga ham yana bittasi rejalashtirilmoqda. 2023 yili taklif turniri tashkillashtiriladi. Birinchi to‘laqonli CHL esa 2024 yili boshlanishi kerak. Uchinchidan, turli musobaqalarga dastlabki muddat belgilandi:
Olimpiada saralashi
1-raund - 2023 yil 3-11 aprel
2-raund - 2023 yil 23-31 oktyabr
Final raundi - 2023 yil 27 noyabr - 6 dekabr
U-20 toifasidagi Osiyo kubogi-2024
1-saralash raundi - 2023 yil 4-12 mart
2-saralash raundi - 2023 yil 3-11 iyun
Final turniri - 2024 yil 3-16 mart
U-17 toifasidagi Osiyo kubogi-2024
1-saralash raundi - 2023 yil 22-30 mart
2-saralash raundi - 2023 yil 16-24 sentyabr
Final turniri - 2024 yil 7-20 aprel
Eslatish kerak, 20 yoshgacha bo‘lgan qizlar o‘rtasidagi turnir 2022 yili O‘zbekistonda o‘tkazilishi kerak edi. 2024 yilgi turnir mezbonligi O‘zbekistonga kompensasiya sifatida beriladimi? Bu hozircha noma’lum.
Aytgancha, Osiyo kubogida g‘alaba qozongan Xitoy ayollar terma jamoasi ikki homiydan jami 23 million yuan (3,6 million dollar) miqdorida mukofot puli oladi. Boshqacha aytganda, har bir futbolchiga beriladigan summa 100 000 dollardan kam bo‘lmaydi.
Alisher NIKIMBAYEV, «Futbolium»
