O‘zPFL bosh direktori Diyor Imomxo‘jayev o‘z "Telegram" kanalida klublarimizning Turkiyadagi yig‘inlari va futbolchilarni ro‘yxatdan o‘tkazish haqida fikr bildirdi.
"Turkiyada mashg‘ulotlar o‘tkazish jamoa uchun yaxshi. Klub esa birinchi navbatda o‘z futbolchilarini O‘zPFL ro‘yxatidan o‘tkazish haqida o‘ylashi to‘g‘riroq. Chunki transfer oynasi yakuniga bor-yo‘g‘i 16 kun vaqt qoldi.
Hozircha chempionat uchun faqatgina "Dinamo" va "Metallurg" o‘z futbolchilarini ro‘yxatdan o‘tkazdi. "Bunyodkor", AGMK, "Neftchi", "Navbahor" esa shartnomalarnigina taqdim etgan xolos. Bu klublar futbolchilar xorijdan qaytishi bilan ularni tibbiy ko‘rikdan o‘tkazishi kerak bo‘ladi. Oldindagi 15 kun vaqt tig‘izligidan kelib chiqib, navbat masalasi katta sahnaga chiqadi.
Superliga klublari orasidan eng og‘ir holat "Surxon"da, bizda xavotir mavjud. Yangi homiylar katta ishni boshlashga tayyor, ammo amaldagilar bilan kelishish cho‘zilyapti. Ularda asosiy masala jamoa kelajagi emas, vaziyatdan chiqib ketishga bo‘lgan intilish bo‘lib ko‘rinyapti", - deya yozdi Imomxo‘jayev.
