"Sanderlend" 40 yoshli Aleks Nilni klubga bosh murabbiy etib tayinlaganini e’lon qildi.

U yanvar oyi oxirida "Bolton"ga 6:0 hisobida mag‘lub bo‘lganidan keyin iste’foga chiqarilgan Li Jonsonning o‘rnini egalladi. Roy Kin bir muncha vaqt bo‘sh o‘rinni egallashi bashorat qilingan edi, ammo irlandiyalik mutaxassis Angliya futbolining ikkinchi ligasida o‘ynayotgan klub bilan ishlashdan bosh tortdi.

Natijada “mushuklar” rahbariyati “Norvich” va “Preston”ning sobiq ustozi – Aleks Nil bilan kelishib oldi. U shanba kungi "Uimbldon"ga qarshi o‘yinda klubni boshqaradi.

- Bu imtiyoz. Bu yerda ko‘rganlarim meni ilhomlantirdi va endi biz hammasini natijaga aylantirishimiz kerak”, — dedi Nil BBC Sport bilan suhbatda.