"Sherlar" Turkiya yig‘inidagi oxirgi nazorat bahsini Ukrainaning "Dinamo" klubiga qarshi o‘tkazishdi.

O‘yinning dastlabki 10 daqiqasida kiyevliklar faolroq ko‘rinishdi va Karavayevning xavfli zarbasi yodda qoldi. Shundan so‘ng "Paxtakor" ko‘proq oldinga o‘tib, raqib darvozasi oldida keskin holatlar yuzaga keltirdi. Rashidovning zarbasi noaniq chiqqan bo‘lsa, Cheran va Turg‘unboyevning aniq urinishlaridan keyin Boyko to‘pni qaytardi. "Dinamo"dan bir vaziyatda De La Pena maydon markazidan to‘pni Suyunov ustidan oshirib tashlashga urindi, ammo mo‘ljalda adashdi.

Ikkinchi bo‘limni ham jamoamiz yaxshiroq boshladi. Rashidov va Erkinovning xavfli zarbalari salgina noaniq ketib, golga aylanmadi. Kiyevliklardan esa Sidorchuk noaniq zarba berdi. Karavayevning jarima maydoni ichidan tepgan to‘pini Suyunov ushlab oldi. Oxirgi 10 daqiqalikda uchta yaqqol golli vaziyatda raqibga omad kulib boqdi. Dastlab Aliboyevning zarbasidan to‘p to‘singa tegib qaytdi. Keyin esa Turg‘unboyev va Mirahmadovning aniq zarbalaridan so‘ng "Dinamo" posboni jamoasini muqarrar gollardan qutqardi. Shu tariqa o‘yinda ustunroq harakat qilgan jamoamiz nomdor raqib bilan durang o‘ynadi.

"PAXTAKOR" - "DINAMO" KIYEV - 0:0
"Paxtakor": Suyunov, Alijonov, Xadjiyev, Larin, Turg‘unboyev, Hamrobekov, Sobirxo‘jayev (Sharkich, 70), Rashidov (Xolmatov, 82), Aliboyev, Erkinov (Temirov, 73), Cheran (Mirahmadov, 82).
"Dinamo": Boyko, Kendzera, Zabarniy, Sirota, Karavayev, Andriyevskiy, Shaparenko, de Pena, Antyux, Vitinyo, Kulach.
Zaxiradan tushganlar: Sidorchuk, Dubinchak, Buyalskiy, Besedin, Vanat, Nesheret, Bol, Popov.