Qarshining «Nasaf» klubi fransiyalik futbolchi Abdelaye Diakite bilan imzolangan shartnoma shartlarini bajarmagani uchun FIFA tomonidan transfer taqiqiga uchragandi.

2021 yilning 7 oktyabr kuni FIFA Nizolarni hal etish palatasi «Nasaf» futbol klubi va fransiyalik futbolchi Abdelaye Diakite o‘rtasidagi nizoli vaziyat yuzasidan qaror chiqargan edi. Unda ko‘rsatilishicha, «Nasaf» futbolchi bilan tuzilgan shartnoma shartlarini bajarmagan.

Shu sababli futbolchi FIFAga murojaat qilgan va yakunda FIFA «Nasaf» futbol klubi zimmasiga belgilangan qarzdorlik va jarima to‘lovlarini 45 kun mobaynida to‘lashi lozim ekani, agar mazkur majburiyatlar klub tomonidan o‘z vaqtida bajarilishi ta’minlanmasa, klubga nisbatan milliy va xalqaro miqyosda yangi futbolchilarni ro‘yxatdan o‘tkazish bo‘yicha taqiq qo‘yilishi haqida ogohlantirish bergandi.

PFL direktori Diyor Imomxo‘jayevning telegramdagi kanalida ma’lum qilishicha, Qarshi klubi muammoni bartaraf etgan.

«Nasaf» FIFAdagi masalani hal qildi va bu bo‘yicha tashkilotga bildirishnoma kiritdi. Tez orada yaxshi yangilik kutyapmiz», - deyiladi xabarda.

Eslatib o‘tamiz, fransiyalik futbolchi Abdelaye Diakite 2020 yilning 7 fevral kuni «Nasaf»ning Turkiyadagi yig‘inida ishtirok etib, Qarshi klubi bilan shartnoma imzolagan. Biroq klub ko‘p o‘tmay 31 yoshli markaziy himoyachi bilan kelishuvni bekor qilgan va Diakite rasmiy o‘yinda maydonga tushmay, jamoani tark etgandi.