Қаршининг «Насаф» клуби франциялик футболчи Абделае Диаките билан имзоланган шартнома шартларини бажармагани учун ФИФА томонидан трансфер тақиқига учраганди.

2021 йилнинг 7 октябрь куни ФИФА Низоларни ҳал этиш палатаси «Насаф» футбол клуби ва франциялик футболчи Абделае Диаките ўртасидаги низоли вазият юзасидан қарор чиқарган эди. Унда кўрсатилишича, «Насаф» футболчи билан тузилган шартнома шартларини бажармаган.

Шу сабабли футболчи ФИФАга мурожаат қилган ва якунда ФИФА «Насаф» футбол клуби зиммасига белгиланган қарздорлик ва жарима тўловларини 45 кун мобайнида тўлаши лозим экани, агар мазкур мажбуриятлар клуб томонидан ўз вақтида бажарилиши таъминланмаса, клубга нисбатан миллий ва халқаро миқёсда янги футболчиларни рўйхатдан ўтказиш бўйича тақиқ қўйилиши ҳақида огоҳлантириш берганди.

ПФЛ директори Диёр Имомхўжаевнинг телеграмдаги каналида маълум қилишича, Қарши клуби муаммони бартараф этган.

«Насаф» ФИФАдаги масалани ҳал қилди ва бу бўйича ташкилотга билдиришнома киритди. Тез орада яхши янгилик кутяпмиз», - дейилади хабарда.

Эслатиб ўтамиз, франциялик футболчи Абделае Диаките 2020 йилнинг 7 февраль куни «Насаф»нинг Туркиядаги йиғинида иштирок этиб, Қарши клуби билан шартнома имзолаган. Бироқ клуб кўп ўтмай 31 ёшли марказий ҳимоячи билан келишувни бекор қилган ва Диаките расмий ўйинда майдонга тушмай, жамоани тарк этганди.